Sīlapāramī 3

“Punāparaṁ yadā homi,

campeyyako mahiddhiko;

Tadāpi dhammiko āsiṁ,

sīlabbatasamappito.

Tadāpi maṁ dhammacāriṁ,

upavutthaṁ uposathaṁ;

Ahituṇḍiko gahetvāna,

rājadvāramhi kīḷati.

Yaṁ yaṁ so vaṇṇaṁ cintayi,

nīlaṁva pītalohitaṁ;

Tassa cittānuvattanto,

homi cintitasannibho.

Thalaṁ kareyyamudakaṁ,

udakampi thalaṁ kare;

Yadihaṁ tassa pakuppeyyaṁ,

khaṇena chārikaṁ kare.

Yadi cittavasī hessaṁ,

parihāyissāmi sīlato;

Sīlena parihīnassa,

uttamattho na sijjhati.

Kāmaṁ bhijjatuyaṁ kāyo,

idheva vikirīyatu;

Neva sīlaṁ pabhindeyyaṁ,

vikirante bhusaṁ viyā”ti.

Campeyyanāgacariyaṁ tatiyaṁ.