Cāpātherīgāthā
“Laṭṭhihattho pure āsi,
so dāni migaluddako;
Āsāya palipā ghorā,
nāsakkhi pārametave.
Sumattaṁ maṁ maññamānā,
cāpā puttamatosayi;
Cāpāya bandhanaṁ chetvā,
pabbajissaṁ punopahaṁ”.
“Mā me kujjhi mahāvīra,
mā me kujjhi mahāmuni;
Na hi kodhaparetassa,
suddhi atthi kuto tapo”.
“Pakkamissañca nāḷāto,
kodha nāḷāya vacchati;
Bandhantī itthirūpena,
samaṇe dhammajīvino”.
“Ehi kāḷa nivattassu,
bhuñja kāme yathā pure;
Ahañca te vasīkatā,
ye ca me santi ñātakā”.
“Etto cāpe catubbhāgaṁ,
yathā bhāsasi tvañca me;
Tayi rattassa posassa,
uḷāraṁ vata taṁ siyā”.
“Kāḷaṅginiṁva takkāriṁ,
pupphitaṁ girimuddhani;
Phullaṁ dālimalaṭṭhiṁva,
antodīpeva pāṭaliṁ.
Haricandanalittaṅgiṁ,
kāsikuttamadhāriniṁ;
Taṁ maṁ rūpavatiṁ santiṁ,
kassa ohāya gacchasi”.
“Sākuntikova sakuṇiṁ,
yathā bandhitumicchati;
Āharimena rūpena,
na maṁ tvaṁ bādhayissasi”.
“Imañca me puttaphalaṁ,
kāḷa uppāditaṁ tayā;
Taṁ maṁ puttavatiṁ santiṁ,
kassa ohāya gacchasi”.
“Jahanti putte sappaññā,
tato ñātī tato dhanaṁ;
Pabbajanti mahāvīrā,
nāgo chetvāva bandhanaṁ”.
“Idāni te imaṁ puttaṁ,
Daṇḍena churikāya vā;
Bhūmiyaṁ vā nisumbhissaṁ,
Puttasokā na gacchasi”.
“Sace puttaṁ siṅgālānaṁ,
kukkurānaṁ padāhisi;
Na maṁ puttakatte jammi,
punarāvattayissasi”.
“Handa kho dāni bhaddante,
kuhiṁ kāḷa gamissasi;
Katamaṁ gāmanigamaṁ,
nagaraṁ rājadhāniyo”.
“Ahumha pubbe gaṇino,
Assamaṇā samaṇamānino;
Gāmena gāmaṁ vicarimha,
Nagare rājadhāniyo.
Eso hi bhagavā buddho,
nadiṁ nerañjaraṁ pati;
Sabbadukkhappahānāya,
dhammaṁ deseti pāṇinaṁ;
Tassāhaṁ santikaṁ gacchaṁ,
so me satthā bhavissati”.
“Vandanaṁ dāni vajjāsi,
lokanāthaṁ anuttaraṁ;
Padakkhiṇañca katvāna,
ādiseyyāsi dakkhiṇaṁ”.
“Etaṁ kho labbhamamhehi,
yathā bhāsasi tvañca me;
Vandanaṁ dāni te vajjaṁ,
lokanāthaṁ anuttaraṁ;
Padakkhiṇañca katvāna,
ādisissāmi dakkhiṇaṁ”.
Tato ca kāḷo pakkāmi,
nadiṁ nerañjaraṁ pati;
So addasāsi sambuddhaṁ,
desentaṁ amataṁ padaṁ.
Dukkhaṁ dukkhasamuppādaṁ,
dukkhassa ca atikkamaṁ;
Ariyaṁ caṭṭhaṅgikaṁ maggaṁ,
dukkhūpasamagāminaṁ.
Tassa pādāni vanditvā,
Katvāna naṁ padakkhiṇaṁ;
Cāpāya ādisitvāna,
Pabbajiṁ anagāriyaṁ;
Tisso vijjā anuppattā,
Kataṁ buddhassa sāsanaṁ.
… Cāpā therī ….
