Maccharisutta

Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ aṭṭhaṁsu.

Ekamantaṁ ṭhitā kho ekā devatā bhagavato santike imaṁ gāthaṁ abhāsi:

“Maccherā ca pamādā ca,

evaṁ dānaṁ na dīyati;

Puññaṁ ākaṅkhamānena,

deyyaṁ hoti vijānatā”ti.

Atha kho aparā devatā bhagavato santike imā gāthāyo abhāsi:

“Yasseva bhīto na dadāti maccharī,

Tadevādadato bhayaṁ;

Jighacchā ca pipāsā ca,

Yassa bhāyati maccharī;

Tameva bālaṁ phusati,

Asmiṁ loke paramhi ca.

Tasmā vineyya maccheraṁ,

dajjā dānaṁ malābhibhū;

Puññāni paralokasmiṁ,

patiṭṭhā honti pāṇinan”ti.

Atha kho aparā devatā bhagavato santike imā gāthāyo abhāsi:

“Te matesu na mīyanti,

panthānaṁva sahabbajaṁ;

Appasmiṁ ye pavecchanti,

esa dhammo sanantano.

Appasmeke pavecchanti,

bahuneke na dicchare;

Appasmā dakkhiṇā dinnā,

sahassena samaṁ mitā”ti.

Atha kho aparā devatā bhagavato santike imā gāthāyo abhāsi:

“Duddadaṁ dadamānānaṁ,

dukkaraṁ kamma kubbataṁ;

Asanto nānukubbanti,

sataṁ dhammo duranvayo.

Tasmā satañca asataṁ,

nānā hoti ito gati;

Asanto nirayaṁ yanti,

santo saggaparāyanā”ti.

Atha kho aparā devatā bhagavato santike etadavoca:

“kassa nu kho, bhagavā, subhāsitan”ti?

“Sabbāsaṁ vo subhāsitaṁ pariyāyena; api ca mamapi suṇātha—

Dhammaṁ care yopi samuñjakaṁ care,

Dārañca posaṁ dadamappakasmiṁ;

Sataṁ sahassānaṁ sahassayāginaṁ,

Kalampi nāgghanti tathāvidhassa te”ti.

Atha kho aparā devatā bhagavantaṁ gāthāya ajjhabhāsi:

“Kenesa yañño vipulo mahaggato,

Samena dinnassa na agghameti;

Kathaṁ sataṁ sahassānaṁ sahassayāginaṁ,

Kalampi nāgghanti tathāvidhassa te”ti.

“Dadanti heke visame niviṭṭhā,

Chetvā vadhitvā atha socayitvā;

Sā dakkhiṇā assumukhā sadaṇḍā,

Samena dinnassa na agghameti.

Evaṁ sataṁ sahassānaṁ sahassayāginaṁ,

Kalampi nāgghanti tathāvidhassa te”ti.