Paṭhamavagga

“Esa bhiyyo pasīdāmi,

sutvā dhammaṁ mahārasaṁ;

Virāgo desito dhammo,

anupādāya sabbaso”.

“Bahūni loke citrāni,

asmiṁ pathavimaṇḍale;

Mathenti maññe saṅkappaṁ,

subhaṁ rāgūpasaṁhitaṁ.

Rajamuhatañca vātena,

yathā meghopasammaye;

Evaṁ sammanti saṅkappā,

yadā paññāya passati.

Sabbe saṅkhārā aniccāti,

yadā paññāya passati;

Atha nibbindati dukkhe,

esa maggo visuddhiyā.

Sabbe saṅkhārā dukkhāti,

yadā paññāya passati;

Atha nibbindati dukkhe,

esa maggo visuddhiyā.

Sabbe dhammā anattāti,

yadā paññāya passati;

Atha nibbindati dukkhe,

esa maggo visuddhiyā.

Buddhānubuddho yo thero,

koṇḍañño tibbanikkamo;

Pahīnajātimaraṇo,

brahmacariyassa kevalī.

Oghapāso daḷhakhilo,

Pabbato duppadālayo;

Chetvā khilañca pāsañca,

Selaṁ bhetvāna dubbhidaṁ;

Tiṇṇo pāraṅgato jhāyī,

Mutto so mārabandhanā.

Uddhato capalo bhikkhu,

mitte āgamma pāpake;

Saṁsīdati mahoghasmiṁ,

ūmiyā paṭikujjito.

Anuddhato acapalo,

nipako saṁvutindriyo;

Kalyāṇamitto medhāvī,

dukkhassantakaro siyā.

Kālapabbaṅgasaṅkāso,

kiso dhamanisanthato;

Mattaññū annapānasmiṁ,

adīnamanaso naro.

Phuṭṭho ḍaṁsehi makasehi,

araññasmiṁ brahāvane;

Nāgo saṅgāmasīseva,

sato tatrādhivāsaye.

Nābhinandāmi maraṇaṁ,

… pe

…

nibbisaṁ bhatako yathā.

Nābhinandāmi maraṇaṁ,

… pe

…

sampajāno patissato.

Pariciṇṇo mayā satthā,

… pe

…

bhavanetti samūhatā.

Yassa catthāya pabbajito,

agārasmānagāriyaṁ;

So me attho anuppatto,

kiṁ me saddhivihārinā”ti.

… Aññāsikoṇḍañño thero ….