Vivekasutta

Evaṁ me sutaṁ—

ekaṁ samayaṁ aññataro bhikkhu kosalesu viharati aññatarasmiṁ vanasaṇḍe.

Tena kho pana samayena so bhikkhu divāvihāragato pāpake akusale vitakke vitakketi gehanissite.

Atha kho yā tasmiṁ vanasaṇḍe adhivatthā devatā tassa bhikkhuno anukampikā atthakāmā taṁ bhikkhuṁ saṁvejetukāmā yena so bhikkhu tenupasaṅkami; upasaṅkamitvā taṁ bhikkhuṁ gāthāhi ajjhabhāsi:

“Vivekakāmosi vanaṁ paviṭṭho,

Atha te mano niccharatī bahiddhā;

Jano janasmiṁ vinayassu chandaṁ,

Tato sukhī hohisi vītarāgo.

Aratiṁ pajahāsi sato,

Bhavāsi sataṁ taṁ sārayāmase;

Pātālarajo hi duttaro,

Mā taṁ kāmarajo avāhari.

Sakuṇo yathā paṁsukunthito,

Vidhunaṁ pātayati sitaṁ rajaṁ;

Evaṁ bhikkhu padhānavā satimā,

Vidhunaṁ pātayati sitaṁ rajan”ti.

Atha kho so bhikkhu tāya devatāya saṁvejito saṁvegamāpādīti.